Nou noré pa doute arien si, na dé trwa zour d’sa, lo minis an kestion lavé pa di ke son lanbision sé ranporte zéleksion zoropéenne pou son parti. Lo zéleksion lé sèt ané mêm, dann kat, sink moi. Alors, Pétète, sirman, si navé point zéleksion Lorope, nou nar té pa vi ali sitôt.

Siklone in bon préteks pou vni issi fé kanpagn élektoral, ni vi ni koni. Toute la press y kour derrière li, soulié verni, kostim trwa piès dann karo salade, sou gro soleil disèr. Kel sinéma. Défoi mi préfère pi garde lo télé, telman mi wa sa lé mentèr. É la na kalité promesse larzan y sorte dovan kaméra : « d’ici vendredi ce sera fait ». Ébin, ek sa nou lé pa sové mé en tou lé ka li la réissi fer kroir détroi ke li ième à nou é ké nou pé vote pou son parti. Pa moin en tou lé ka ! Alimèm lo minis la lèss la popilassion Mayotte sans in goute dolo. Alimèm lo minis y vienne vote la loi imigrassion pou interdit soigne bann zétranzé en Frans.

Mi pense pa li va règ in sèl problèm dann nout péï. Si ni pran pa lo tan, nou-mêm, assiz ansannb, réfléshi dessi nout sitiasion, mazine kossa y fo fé en avans pou prévoir sitiasion konn sa, si nou pran nou-mêm nout destin en min, nou sora touletan konsa la min tendi dovan in bande rapas de passaz.

Ni artrouv.

Justin