Lakey lo sit > Chroniques > Oté
« Bon konte, bon zami ! Mové konte mové zami ! »
In kozman pou la route
zedi 26 out 2021, sanm
Médame zé méssyé, la sossyété, koze èk mwin sé koze èk in kouyon, mé sé o pyé d’lo mir k’i oi lo masson.
Mézami souvan dé foi wi antande demoune apré di zot i travaye an konfyanss. Mi invite azot a méfyé pars konm i di : « konfyanss lé mor san z’ète malade ». Konbien foi nou la fine antande l’avé bon zami, mé zordi la fine brile la paye pars lo konte té pa klère. Sa i ariv galman rante mari é fame, rante zanfan épi paran.
Antansssyon la pa toultan lé konmsa é déssèrtin mari i gingn bien travaye avèk zot fame, konm déssèrtin zanfan i pé bien travaye avèk zot paran mé ladan lo normal é l’anormal i marsh kote a kote, konm lo korèk avèk lo pa korèkt, lo klère avèk lo kripté. Mwin la déza antande kissoi in madame, kissoi in méssyé apré di zot i fé konfyanss l’ote koté soulyé pou tienbo zot konte. Mi di pa arien, mé mi anpanss pa moinss : larzan lé dan la min grandyab sa, sé li k’i zoué avèk sa é myé k’lé zanz.
Alé, mi kite azot rofléshi la dsi é ni artrouv pli d’van. Sipétadyé.
