Dann laksidan l’avyon l’ariv dann péi Komor, nana in n’afèr lé in pé bizar. In l’aparèy la sort Paris pou alé Sana, é bann pasazé la dé-sann, épi la pran in n’ot pou ariv ziska shé zot.
Dizon, sa sé in n’afèr possib. Solman bann Komoryin i di : dézyèm l’avyon-la, sa in sèrkèy volan, é zot la pèr kan zot i rant la-dan...

Gouvèrnman fransé i di la konpagni lé pa déssi in "list noir", donk intèrdi pozé-lévé an Frans, mé lo lavyon li, té défandi pozé-lévé an Frans pars li té pa konform lo règloman. La konpagni i di laviyon-la i sort kontrolé moi dèrnyé é toute té bon.
Toute ? Oui, mé l’ariv in laksidan la tyé 152 pèrsone, é pétète i konétra pa kossa l’arivé pou vréman, pars la pa sir i artrouv lo boite noir.
Lé in pé bizar galman, pars avèk toute bann moiyin éléktronik nana koméla, lé blizé pass par boite noir pou konète sak la éspassé an lavyon, é bann boite boir i pèrd in pé tro souvan.

Lé ga, zistoir-la i san lodèr larzan : pars si in pé l’avyon lé pa bien okipé, si i sharj sa ziska la guèl pou antass demoun dédan, si i rode toute métode pou pa dépans la moné anplis, sé pars i vé fé profi ; é tanpir, si tazantan...
Non va ! I paré lo transpor dan l’avyon lé plis sékirité ké dann loto, mèm dann lo trin. Sé kissa k’i di sa ? Sé léstatistik ! A bon ? Alé di sa bann famiy sak la pèrd z’ot moun dann laksidan ! Moin lé sir banna sar kontan. Kontan pars in pé i voiyaz dann laviyon lé pa blacklisté, é d’ote, an parmi bann moun Komor, dann l’avyon blaklisté, é sa lé bon pou in pé : sa i pèrmète azot gonf z’ot pla !

Justin