Lé pa nésésèr argard si kozman moin la mark an-o la néna in rolasyon avèk lo laktyalité, mé san vouloir titiye pèrsone mi diré mi oi in rolasyon d’koz-a-éfé… Mi ansouvien, néna kék moi in dalon la di amoin li yèmré oir lo kou d’la vi béssé pars omoins lo nivo d’vi lo moun va goumanté. Moin la réponn ali néna in manyèr bien sinp goumant lo nivo d’vi sé goumant lo bann rovni. Pars a bien rogardé : bon marshé i kout shèr ! Pou kisa ? Dabor pou lo prodiktèr pars i ratiboiz son bénéfis. I kout shèr pou lo travayèr, pars pou vann bon marshé i diminyé son salèr. I kout shèr pou lo konsomatèr pars i vann a li la gnognote soidizan bon marshé alé oir lé touzour shèr pou sak i lé. Arzout ankor si ou i vann bann produi bon marshé, ou i favoriz pa lo dévlopman l a prodiksyon é tout pèryod la bèss lo pri sé in pèryod shomaz, sé in pèryod pou ratiboiz bann rovni la popilasyon… Alor, mi invite azot rofléshi la dsi é ni artrouv pli d’van. Sipétadyé !