Zot i koné Madona ? Mi oi d’isi zot zié i briye konm lo shat dann fénoir. La pa sèt zot i mazinz la, sèt-la, sé in bato, téi sort lërop, té i amen isi in bann solda, la parti fé la gèr katorz-dizuit.

Bato-la té tro léjé, la mèt la tèr ann dan, konm sa li tien bien lékilib sü la mèr.
Soloman, dann la tèr-la, i prétan, lavé mové virüs, virüs la grip éspagnol. Bann kondané la désharj la tèr, la komans ginye lo shok : zot mem la komans mor an prëmié, aprésa la maladi la fé l’tour L’il, par plas la mont in pë dan lé-o.

Bann vaza i pèrd lèr, i di la poin lépidémi. Bann ti-kolon i grinn konm moush. Tout i prièr bondié mé bondié i rogard pa zot tro. Alor domoun i pran in pé tout médikaman, i mèt grézil, i bril kanfr. In pë i boir lo rom an kantité, in pë i fé karem, i fé tout in bann simagré i ansèrv pa arien.

So grip-la la dir par-la sink somen, finn mars, komansman moi d’mé. Li la fini avèk in siklone sèk dann moi d’mé, lë onz. Konbien d’moun lé mor : i koné pa tro o-jïst,pé-t’èt di mil moun konmsa.
So foi isi, mové nouvèl l’ariv par la mèr.

Justin