Mésyé, Médam, la Sosyété koz èk moin sé koz èk in kouyon, mé sé o pyé d’lo mir k’i oi lo bon mason. Mé zami, mi pans zot i koné kozman-la, pars moin pèrsonèl néna kèk é kèk zané moin lé fine antann sa-mèm moin la fine antann kékshoz i rosanm son kontrèr, kan i di : « Avèk in koshon i fé pa in shoval de kours ». Sansa ankor : kalbass amèr i suiv la rasine. Mé alon ropran nout kozman : zot i koné néna tout kalité lo shien demoun la fé la ras pou aprann azot fé in n’afèr prési konm shien pou gardien, sansa shien pou bataye, sansa ankor shien pou travaye. La shass galman néna son shien é lé pli fasil amontr ali shasé plito k’amontr sa in n’ot kalité lo shien la paf é éksepré pou sa. Mé kozman an-o-la sé in provèrb é i pé aplik demoun i viv an sosyété. Sé konmsa si in marmaye i travaye bien si li lé for dann lo matématik, lo fransé demoun va di sé d’famiy. Donk bon shien i shass de ras. Alé ! mi kite azot rofléshi la dsi é ni artrouv pli d’van. Sipétadyé.