Yèr l’il Maurice la fète son sinkantyèm l’anivèrsèr : sinkant z’ané Maurice lé indépandan é si ni kroi bann zournal, si ni kroi galman sak ni oi kan ni sava bate in karé laba forsé pou romark Maurice la réissi son l’indépandans. Biensir tout lé pa roz san pour san mé ni pé dir lo péi la tras son shomin épi li marsh dann sans lo progré.

San flaté, ni pé dir l’indépandans Maurice sé in l’indépandans réisi an konparézon avèk in bon pé péi. Poitan, kan bann zéspèr zanglé la vni dann péi-la, avan son l’indépandans, zot la di : sak i atann Maurice sé in katastrof é zot l anons la guèr sivil, la guèr rant bann kominoté, la famine, lo l’apovrisman. Poitan arien dann tousa-la la éspasé é zordi lo péi sé in péi démokratik, i marsh firamézir dsi son dévlopman, é moin pèrsonèl mi pans nout bann frèr morisien i pé z’ète fyèr pou sak zot la nyabou fé dann in pèryod sinkant z’ané solman.

In n’afèr, moin la aprésyé sé z’ot fyèrté : zot lé morisien épi zot lé fyèr par raport z ‘ot péi dann l’indépandans. Lo péi néna arienk dé mil kilomète karé é avèk son pti sirfas li nyabou fé viv konm i fo son bann zanfan. Arzout avèk sa z’ot fyèrté l’amenn azot baz dsi zot pou z’ot réisi. Pa kont dsi baton tonton pou travèrs la rivièr.

Souvan dé foi ni antann ankor d’isi d’laba morisien manzèr d’zako – ni antann galman bann morisien trète anou d’bourboné - pars zot i koné néna in vyé détèstasyon rant zot épi nou, mé néna galman in vré l’amityé rant Maurice épi La Rényon. Dé foi an rèv mi majine nout dé péi noré pi fé in l’alyans pou nou marsh ansanm dann sans lo progré mé sé in n’afèr la pankor arivé konm zot i koné. Défoi, mi majine sinploman si nou té kapab partéd’ot pran shé nou é shé zot sak lé méyèr pétète nou nora té fine alé pli vite, alé pli loin, marsh dann méyèr shomin galizé.

Alé Mon bann frèr, mon bann kouzin, mi souète azot in bon sinkantyèm l’anivèrsèr, in l’avnir klèr, in l’avnir méyèr.