Médam, Mésyé, La Sosyété koz èk moin sé koz èk in kouyon, mé sé o pyé d’lo mir k’i oi lo bon mason. Mé zami, dsi la késtyonn bon travayèr-mové travayèr i fo ni koné kèl koté ni mète anou, pars néna la plipar d’tan dé parti ladan : néna lo travayèr, épi néna son kliyan. Lo travayèr i oi koman li doi forsé pou fé lo travaye. Li oi galman son transpirasyon épi la difikilté li néna pou fé in n’afèr konform. Lo kliyan i oi lé shoz i avans pa asé vite, li trouv lé shèr, pli pti défo sé in roprosh li fé sansa li gard pou li. Tout fason, souvan défoi inn avèk l’ot lé zamé kontan san pour san, i kite pa zot kèr klèr. Pou lo zoutiy, pou inn lo mové zoutiy i fé lo mové travaye, é lo mové travayèr zistoman li néna mové zoutiy ; pou l’ot lo bon zoutiy i fé lo bon travaye é lo bon travayèr néna bon zoutiy. Dopi ké lo mond lé mond la touzour été konmsa é mi oi pa pou kosa i sava shanjé. Alé ! Mi kite azot rofléshi la dsi é ni artrouv pli d’van. Sipétadyé.