Zordi 2 zanvyé, si mwin l’avé pou fé in l’éditorial pou vréman mi pans mwin nora an parl sak i fé lo patrimoine nout zoinal o sèrvis Lo pèp rényoné, épi bann pèp nout réjyon loséan indien, épi ankor bann pèp oprimé konm Chagossien épi Palestinien é d’ot ankor mé sé banna i rovien pli souvan dann mon panssé. L’èrla mi di dann mon kèr, lo péi lé pti, lo pèp lé pa nonbré, nout parti lé pa for-for mèm mé boudikont ni kiltiv in plant i fé la rishèss l’imanité é plant-la i apèl la solidarité , pa in mo zété, mé in prinsip ni kroi dé san pour san.
La solidarité, mé galman l’éspoir bann pli pti va rolèv la tète san tardé : oprimé souvan, ésploité galman, san rokour la plipar d’tan, mé touzour la, touzour prézan, avèk la konfyanss dan nout kèr pou in ord sosyal, ékonomik, kiltirèl, anvirone mantal pli zist.. .Pou kossa bann zidé-la souvan défoi la éklo issi shé nou é kan li la pa éklo nou la kapar ali pou nou konm zidé just., konm bann zidé d’avnir.Nou la planté épi li la pran rasine in pé partou épi li la done flèr épi li la done frui épi li al=montr shomin pou l’avnir..
Mézami fransh vérité, si in pé partou l’avé pran nout zidé, bien konm k’i fo, l’avé aplik azot, l’avé ède grandi azot, zot i panss pa lo mond sré méyèr ké li lé zordi ?Zot i panss pa noré moinss la mizèr, l’inzistis, pliss la kiltir, pliss la zistiss, in méyèr klima. Pa bézoin nou la pèr la vérité mézami-mé kamarad, pa bézoin nou la pèr di sa, proklam sa, difiz sa. . I paré na poin arien néna pliss la fors k’in lidé kan la majorité d’moun i adère. Alor alon domann lo moun pou adéré é konmsa lo mond va shanjé.
In pti mo pou nout kréol rényoné : mi proklam zordi konm an toutan mon konfyanss dan li : li lé pi faye koméla an kon trèr li lé dévlopé, li lé pi méprizé koméla, la plipar d’moun i rokoné son valèr ;li port nout kiltir in kiltir plin l’orizinalité. Mézami sa in arm sa pou nou, é in arm pli for k’in bonpé i kroi,sé anou d’ékip anou avèk sa. I fo ni donn kréol son plass, arienk son plass é toutt son plass.Ni artrouv pli d’van.
Bone ané mézami mé kamarad, bone ané 202i bone érèz érèz é an dalonaz.