2011 la fini, 2012 la fine arivé. Konm la koutime i vé, sé lokazyon souète inn bonané tout demoun ou i koné, tout demoun ou i aprésyé, épi konm di lo kont tout bann dalon ou lé dakor pou partaz in gazonn ri ansanm. Lé zot ? Mardi gra, shakinn son bann ! Lé zot ? Mi sava pa ziska souète zot i kass zot pate. Mi sava pa ziska souète malèr i ariv pou zot. Non ! Mi souète azot, sak zot i pé an avoir de bon pou zot individyèlman, san fé d’tor lo pli gran kantité d’moun. Lé normal, pars sanm pou moin la majorité d’moun issi La Rényon, konm in pé partou, i pass in mové kouran.

Pou kosa ? La kriz ? Li na bon do. Li la pa ariv konmsa, in zour san ké pèrsone la pa fé arien. Li la pa ariv, san ké pèrsone i konsidèr pa la finans intèrnasyonal konm in gran jé d’loto. Pli pir, olèrk i fé pèy azot pou sa, sé nou k’la péyé. Sé zot la kontinyé zoué zot zé d’loto san kass la tète… zot la kontinyé amène lékonomi é la sosyété an dégréné. Nana in Bernard Maddock lé dan la jol dann l’Amérik, nana in bonpé lé an libèrté é l’apré prépar azot pou mal fèr. Nana ossi in bann fézèr d’movèz politik lé paré pou kontinyé, lé paré pou rokomansé. L’èr-la, zot i konpran, mi pé pa souète banna la réisite dann zot mové l’antropriz.

I di, pou nou, konm pou in bonpé péi épi réjyon, l’ané 2012 sar pli pir ké l’ané 2011. Biensir, na poin pèrsone, pou souète in n’afèr konmsa ! Mèm pou l’aktyalité donn ali rézon ! Mé sak ou la planté yèr, sak ou i plant zordi, ou i ramas domin, mé si ou la pa planté ou na poin arien pou rékolté. Si ou i distribyé sak ou la poin, in zour i apèl domin ou lé riskab ète dann malizé, sansa mète demoun dann dézagréman. Mon pansé i sava biensir pou tout bann ti-kolon nana La Rényon épi in pé partou pars, malérèzman, lo tan sar dir pou zot, alé oir zot lé pou arien dann déga bann gaspiyèr, bann kassèr, bann gatèr l’apré fé.

Zot i konpran, mi éspèr pou kosa mi souète la bonané individyèlman toulmoun. Mi souète ossi in bon l’ané d’shanjman. Mi souète galman in bon l’ané mon parti rényoné.

Justin