Médame zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami, kozman-la mwin téi antand sa kan mwin lété pti marmaye-in pé for mé pti marmaye kant mèm .Nou téi di sa kan solèye avèk la plui t’apré lité, inn avèk l’ote, pou konète kissa k’i gingn, lo bo tan sansa lo mové.

Fransh vérité m’a dir azot mwin la touzour èm in tan konmsa. Mwin la touzour èm kan la plui téi rafrèshi mon figuir é solèye téi poik ali in pé an mèm tan.Nou marmaye la kanpagne ni yèm la natir é ni apréssyé aèl konm ki fo avèk anpliss lo sorte mémoir noute po d’pti yab i rotien dsu lépizode la lite rante solèye épi la plui. Sa lété konm gravé dsi noute disk sa !

Sho, fré, mouyé, sèk é nou téi pass proshin lépizode météo kontan konm bande pti produi la natir nou lété.

Mi kite azot rofléshi la dsi é ni artrouv pli d’van. Sipétadyé.