Médam, Mésyé, la sosyété, koz èk moin sé koz èk in kouyon-sé o pyé d’lo mir k’i oi lo mason. Yèr nou la koz Bondyé, zordi ni koz ankor Bondyé mé konm moin l’avé fé romark azot yèr Bondyé i aparète pa vréman bon. Li pini é moin la aprann dann mon priyèr li lé infiniman bon infiniman émab, donk li koné pardoné. Mé konm moin la di osi, moin la pa in konésèr pou vréman dsi la késtyonn Bondyé, donk si lo sizé i intérèss azot mi dékonsèye azot lo poinnvizé d’justin dosi la késtyon. Mé alon rovnir in kou dsi la késtyonn pini-pini pa galé donk lé posib li pini d’moun alor pars galé la pa tro sansib dsi la késtyonn pinisyon é kan ou i di sa inn pèrsone, la plipar d’tan ou i trouv pa èl sinpatik é sré plito konm in ménas ou i fé plane dési son tète. Alé ! Mi kite azot rofléshi la dsi é ni artrouv pli d’van. Sipétadyé !