In kozman pou la route

« Bondyé i pini pa lo rosh ! »

14 out 2025, sanm Justin

Médam zé Méssyé, la sossyété, néna bonpé kozman avèk Bondyé dann la lang kréol rényoné. Sé in n’afèr mi konstate san konète pou kossa égzaktoman : défoi i di « Bondyé i koné kossa li fé ! ».D’ote foi i di : « Bondyé lé gran ! ».Boudikonte néna in kantité manyèr pou maye Bondyé avèk toute bann ti mizèr i ariv anou dsi la tèr.

So foi issi, i anparl la pénitanss Bondyé. Pars si ni koné bondyé i pini pa lo rosh nou lé sirésèrtin li pini demoune la fé dé shoz i fo pa, la pa bien konporte azot dann la sossyété é zot i mérite in pinission….Mé zot va domann amwin si zot la parti katéshiss : « Ni koné Bondyé lé bon é si li lé bon, pou kossa li pini ?Pars li lé just ? Pétète mé o fon mi koné pa arien dann sète afèr-la…

Konpran amwin bien mi vé pa anparl dsi la téolozi pars o-fon di fon, mi koné pa arien dann syanss-la, sof sak mon famiye la di amwin étan pti é moi kontinyé transporte sa avèk mwin é mwin lé sir mwin va transporte sa ankor in bon d’tan.Si Bondyé na pityé.

Alé ! Mi kite azot rofléshir la dsi é ni retrouv pli dvan, sipétadyé.

Justin

Padport

Signaler un contenu

Inn modékri, inn ti lavi, inn komantèr ?

Témoignages - 82e année

+ Lus


2026 Témoignages