Médam zé Méssyé, la sossyété koz èk mwin sé koz èk in kouyon mé sé o pyé d’lo mir k’i oi lo masson.

Mézami noute toute i panss néna in zistiss dsi la tèr é ké ni doi pa fé ninporte kossa si ni vé pa la vanzanss divine i tonb dsi nou. Pars si Bondyé i pini pa lo rosh, li pé pini demoune. Ni pé dir bonpé rante nou i diriz zot vi dsi la tèr par rapor la zistiss divine. An gro si ni fé déssèrtènn shoz épi ni interdi anou pou fé d’ote shoz sé pars nou néna la krintiv Bondyé pars li-mèm i koné lo bien é i koné lo mal.

Biensir sa i konssèrn arienk sak i kroi Bondyé épi lo zisman final, pars sak i kroi pa li diriz ali dan la vi par li mèm, é final de konte sé son konsyanss k’i indike ali sak lé fézab, sak lé pa fézab, sak lé a fèr épi sak lé pa a fèr. Néna in n’ote afèr sé la pèr la loi : la pèr lo zandarm sé lo komansman la sazèsse.
Alé !

Mi arète la, é mi invite azot a rofléshir la dsi é ni rotrouv domin siplétadyé