Médame zé méssyé, la sossyété koze èk mwin sé koze èk in kouyon mé sé o pyé d’lo mir k’i oi lo masson.

Mézami mi koné pa si zot i koné kozman-la. Mwin mèm mi rofléshi dopi lontan san trouv in sanss akséptab pou mwin pou in kozman konmsa. Biensir mi konpran bien wi of sansa wi done sak ou néna, zamé sak ou na poin. Astèr, in pé i di wi done sak ou néna d’méyèr : si sa lé vré Bondyé néna kékshoze de bon a doné, lo Dyab li na poin arien d’bon pou li ofrir. Par définission l’anfèr la pa in bon zafèr ditou mèm si i di li lé pavé avèk bande bone zintanssyon… lo paradi pou son par néna lo bon pou doné sansa pou ofrir.

Kossa i déranj amwin boudikonte dann kozman-la ? Afors rofléshir mwin néna konm dan lidé dyab avèk bondyé sé lo rékto avèk lo vèrso in mèm paz papyé sansa lo pyèss moné : si bondyé i pé rékonpanssé sansa si li gin pinir, lo dyab la pa bézoin égzisté. Suivan sak wi fé wi pé gingn lo paradi sansa gingn l’anfèr : in koté lo bien, l’ot koté lo mal. In koté lo paradi, l’ote koté l’anfèr. Lo donatèr final de konte sé lo mèm. Alé ! mi kite azot rofléshi la dsi é ni rotrouv pli d’van. Sipétadyé.