Talèr ni sava antèr Sin-Silvess. L’ané 2010 sar fini. Domin in nouvèl ané va komansé. Shak foi in l’ané i fini, tout demoun i pans l’ané k’i vien sar pli méyèr ké sak i sorte passé. Ni pé pans sa ! Ni pé kroir sa ! Ni pé souète sa ! Ni pé mazine domin sar méyèr ké zordi.

Poitan, bann mové limyèr i klèr par-si par-la. Dépi in bon koup de tan, nana trann-sink shomèr an plis par zour k’i pass. La rolans bann gran shantyé, sé in rolans avèk la krash solman. La rolans tourism, pou l’instan, sé plito in rolans gaspiyaz larzan piblik ; Gouvèrnman, son tour, i arète pa sèr la vis : bann koléktivité lokal, mèm larzan li doi li donn pa. Le nouvo z’akor Matignon, konm i apèl sa, la foute anou dann in fo-trin. Olèrk an avoir dé gran shantyé, lo tram-train épi la rout litoral, nou nora aryink inn, é la pa domin la vèye, si la pa la Sin-glin-glin. Esétéra, étsétéra, la ké lo ra.

Dann nout sosyété, lo rasism i arlèv la tète ; Zot toute i ansouvien koman in proféssèr i apèl Serge Copy la insilt bann fam La Rényon. Zot i ansouvien in rapor déssi lo tourism la amontr lo doi bann "kaf". Tanka la fason ékrir an kréol la mazorité d’moun, in nouvèl dépité i apèl sa lo kréol kaka... Mé bann Rényoné la trouv la répons é la fé pète in vin Désanm konm l’avé zamé fé oparavan. Arzoute èk sa, in komité déssi l’istoir La Rényon la déside apèl l’ané 2011 l’ané pou Élie, zésklav révolté l’ané 1811 ; Pans ankor bann jè nn la parti féstival La jénès é la rotourn avèk in grouyman l’idé dann zot tète. L’ané 2011, sa lé sir, sar pa in l’ané bra kroizé !

Alor, l’èr l’ané 2010 i fini, l’èr l’ané 2011 i komans, mi pans i fo souète anou in bone ané 2011, in bone ané dan la lite.

Justin