Oté

Bone ané 2019 ! Bone ané nout péi bienémé ! Bone ané lé zalantour pou fé avèk nou l’indyanoséani !

Justin / 31 désanm 2018

JPEG - 43.6 ko

L’ané 2018 apré lav son pyé.L’ané 2019 déza l’apré point son bout né.L’èrla ni di l’ané 2018 lété pa tro in bone ané. Epi ni souète l’ané i vien sar in méyèr l’ané pou nou ! Nout péi la pass in mové l’ané 2018 : son bann plantèr la soufèr vréman ! son bann l’antroprénèr la bèss plizyèr kran ! Nout bann jenn diplomé la pa trouv in bon plas i mérite azot dann nout péi ! Nout bann jenn, nout bann shomèr la pa gingn lo boulo zot téi éspèr épi la konsidérasyonn moun tout nout bann zanfan éné isi i mérite.

. In fidèl lobsèrvatèr la sityasyon isi dann nout péi, i pé pa fé in n’ot afèr ké rann ali kont par li mèm la sityasion nout péi épi son bann zabitan i aranz pa pou vréman. Bann voiyan sak lé o rouz, néna tandans a vir dann vyolé-in nouvo koulèr pou l’alèrt siklonik. Lo bann voiyan lé o vèr néna tandans a klignoté , mèm vni pli pal, avèk la fason Macron la mal azi par raport anou !

Mé sa i doi pa anpèsh amoin souète azot in bone ané : a zot bann plantèr, azot bann diplomé, azot bann zouvriyé d’talan, azot bann zartis, azot bann zékrivin, azot bann z’asosyasion, azot la zénès, azot ankor bann marmaye, azot tout sak lé kapab mète La Rényon anlèr. Azot bann z’ansien k’i yèm nout péi pliské n’inport akèl. Azot mi konsidèr konm patriyot rényoné., konm amouré par raport nout tèr rényonèz !.

Azot mi di, nout péi La Rényon néna moiyin pou ansort ali é li doi ansort ali. Donk pou l’ané 2019, mi souète azot in bone ané dan la lite pou ansort anou, pou nou sort dann fénoir épi alé dann féklèr. Nou lé kapab ! Ni pé ! Nou va gingn fèr si ni done anou lo moiyin k’i fo. Bone ané nout tout ! Bone ané zot tout é bone ané pou z’ot famiy ! Bone ané nout péi bienémé épi tout bann péi lé alantour i fo zot i fé avèk nou l’indyanoséani !

Alon dévlop nout péi ! Alon amenn ali dann shomin galizé ! Alon dévlop in solidarité indyanoséanik !