Nou pé pa ramas "toute la misère du monde" : konmsa mem in pé d’moun i koz épi lo fason kozé lé si tèlman dos nana in bon pé dmoun i tonm dakor sanm so fason oir lé shoz. Zot i trouv pa banna la rézon. Sof si ou kalkil pou kosa bann moun-la i sort dann zot péi épi i vien dann in péi étranj. Par égzanp nana in gouvèrnman kriminèl, bann kolonializatèr la mèt an plas, i rod kaokine azot. Sof si bann zésploitèr i sort dann péi étranj la ruine banna : la bril (sansa la fé bril) la tèr koud napalm, Sof si la fé plant domoun in bann plantaz i angrès arienk bann kolonializatèr avèk bann néokolonializatèr. Sof si zot la rann bann moun fou avèk la rolizion, avèk lo rasism, avèk doulèr bonbardman. Sof si bann péi rish la détrui la tèr par la polision, la détrui la tèr banna, i pous pi arien dosü Epi, nou, isi La Rénion, nout zansète i sort in pé partou, kisoi kaf, kisoi blan, kisoi shinoi, z’indien, malgash, komor. Zot la pa vni isi par plézir : in pé lariv la shinn dann pié, in pé bann moun la kapaye azot la fout azot dann fon bato, la mark in kontra zangazé pou zot, la pa réspèk kontra-la. la mèt nout arièr gran manman o mal konm i mèt zanimo : fanm ansint, i vann pli shèr.
Zordi nou lé la, ni oi nout bann ti-kouzin, sansa aryèr-aryèr ti-kouzin i ariv, léstoma la fine séré avèk la fim, lo kor la fine manké avèk la maladi, tousa boubou partou sü lo kor. Kosa i fo fé ? La mèr lé mové, bato va shaviré, la mor i trap banna, nout vié famy ansanm. La pa in krime vik ni gingn pa ramas"toute la misère du monde". Nou lé an droi fé sa pou prézèrv nout somon fimé épi nout shanpagn la nouvèl ané.
Bone ané mésié Lepen, bone ané mésié Sarkozy, bone ané d’ot ankor. Trakas pa nana rokin dan la mèr, lo kor la poin pou lontan. Bone ané ! Bone ané ! Bann salté.

Justin