Koman-koman lané la fini ; in ot lané i sa komansé. Antansion ! kroi pa mi sa fé"prédiksion" ! Mi kroi pa sa, mi pans plito konm Voltaire téi di : "L’astrolozi la komansé kan lo promié sharjèr d’lo la trouv lo promié kouyon*". Mi ékri azot pou souète azot in bone ané : pou kisa ?
Pou mon bann dalon la kültür pou dir azot : Shomin granboi, sa lé long... ti-pa, ti-pa n’arivé. Nou la fine fé in bon bout shomin. Pou mon bann kamarad la politik pou dir azot, nou va avans ankor lané 2007 si nou fé konfians nout parti épi son tik-tak lalians. Pou tout bann vié kamarad, bann vié z’ami i sava inn apré l’ot : nï di azot sé par zot nï ginye marsh dobout zordi, akoz zot la tienbo séktèr kan lo tan té dir. Pou tout domoun i lir zournal “Témoignages” : sa in zournal i inform son léktèr.Oubli pa tout moun i sava sü temoignages.re. Pou toulmoun i mèt La rénion anlèr dann lékonomi, la sians, l’éspor, la mizik épi tout lé z’ot zafèr valab.
Pou toulmoun i ral lo diab par la ké ; mi di a zot si nou lé solidèr nou v’ariv konbat la mizèr. Mi di azot galman : dann shak moun nana in afèr valab i fo mèt anlèr. Pou tout marmay i lèv : zot mem va fé lavnir nout péi. Konm di domoun kan téi konfès : pou tout sak moin la oublié. Bann gatèr, bann mové fon, bann abüzèr dsü, bann bézèr d’zèf o la, mi di azot la pa tro tar pou fé zot révolision. 2007 sar in bon lané pou sa. Konm bann gramoun i di : bone ané épi Lané proshène si plé-t’a-dié.

Justin

*traduction libre de la citation de Voltaire : "L’astrologie a commencé quand le premier imbécile a rencontré le premier escroc".