Lané 2007 lé bien faye : I tard pa, va shant son mizéréré. Solman lané 2008, i ariv son tour épi zourdlan sar la... Zourdlan, dann tan d’avan, sa té in grann fète, pli gran fète lavé dann lané. Koméla galman ? Koméla, nana si tèlman la fète, lé difisil konète lakèl lé pli gran. Toute sé topète pou morète, morso savon, boite zalimèt.
Dann tan, kan zourdlan téi ariv, lo fiyèl sansa lo fiyo téi sava rann vizit lo parin épi la marèn. Sa té in n’afèr té i falé fèr sa, akoz lo parin èk lo marèn sé sak la tir lo diab dan nou, épi la fé promès ède nout papa èk nout momon grandi anou.
Alors, si zot lé konm moin, si zot la rann vizit z’ot parin tanm’ti épi z’ot marènn. Si banna lé ankor vivan, alé oir azot ! Si zot lé pi la, alé oir azot ossi, mé solman dann z’ot mazinasion ! Kalkil lo tan, té i done azot in bout paté kréol, sansa gato kat kar, épi in pti vèr lanizète, in vèr siro. Kalkil tan-lla !
Épi, sirtou, souète inn bone-é-érèz ané, zote famiy, zot bann zamiz, zot bann dalon, bann moun zot i koné. Sérié, pa konmsi-konmsa, a la vol, mé konm si sa i doi arivé. Alé ! Bone ané zot toute ! N’artrouvé !

Justin