Oté

Bone ané zot tout ! Bone ané La Rényon ! Bone ané mon péi !

Justin / 2 janvier 2018

JPEG - 43.6 ko

Kan i ariv promyé zanvyé, nout tout i souète la bonané. La pa pou sa ké l’ané sar méyèr ni pli mové, mé solman ni sava pa souète in mové l’ané, mèm si sé pou in moun ni manz pa in grinn sèl ansanm. Par l’fète ni pouré bien souète in mové l’ané pou tout sak i fé d’tor nout péi ! Pa in mové l’ané pou zot mèm sansa pou z’ot famiy, mé in movèz ané pou z’ot politik… Konm mi sort ékrir, i souète pa in movèz ané pou in moun, alon pa souète in movèz ané mèm pou sak i amenn in mové politik, mé bien sir san souète la bone ané bien antandi.

Moin lé sir, in pé rantre zot, l’apré d’mandé ousa Justin zordi i vé amenn azot. Ousa li vé alé pou bate konm li l’apré fé in karé dann in ron ?

Ousa mi vé alé ? La pa konpliké ! Mi vé ariv a souète la bone ané lo pèp rényoné é an parmi sak i mète La Rényon anlèr. Kisoi bann z’artis ! Kisoi bann ésportif bon nivo ! Kisoi bann z’aktèr kiltirèl ! Kisoi ankor sak dann z’ot koin l’apré travaye pou fé avans nout péi… invant in tiktak, rann in n’ot pli éfikas. San obliy sak i pratik la solidarité soir o matin, matin o soir. Pars sa osi i mank pas shé nou.

Mi pans galman an parmi bann rényoné sak nana in talan, konm lontan téi di bann noir d’talan pou sak zésklav sansa z’angazé lété kapab fé bann métyé éspésyalizé, bann métyé kani fyé. Si té i falé klass demoun rant zéro épi vin bann rényoné d’talan moin nora done azot in 18 san tranblé, pars lo talan sa sé késhoz lé inportan dan la vi in péi, dann sète in pèp, dann in group de moun.

Mi pans, moin la fine ékri, in plas, shakinn nana son talan. Shakinn nana in konpétans mèm si la sosyété i fé pa in kont asé avèk sa. Si zot i vé, zot i pé, an rogardan otour d’zot, romark sak mi di lé vré. Moin lé sir, an konésan d’moun, zot i pé fé la romark rényoné d’talan la pa in n’afèr rar. Donk mi souète azot in bonané 2018. Mi éspèr sète ané zot va fé romark azot pou z’ot talan déza an flèr, pétète ankor an bouton mé k’i sava pète an flèr, moin na poin doutans la dsi.

Bone ané zot tout ! Bone ané La Rényon ! Bone ané mon péi !