Antouléka sé sak mi souète azot kan mi di « Mi souète azot inn bone ané. ». Azot bien sir, pèrsonèlman. Mé galman zot famiye, zot zami, zot dalone èpi zot dalon, pou sak i rande la vi pli gayar pou zot. Zot pti réyon d’solèye. Zot i oi pa kissa sansa kossa i lé ? Bin zistoman sé pars zot la pankor rodé mé pou égzisté, li égzist é sé sa ké ni doi dir anou an promyé kan ni lèv avèk l’ané 2023.

Astèr si nou téi souète lo méyèr pou noute péi, pou La Rényon. Normal ni souète lo méyèr pou li, pars zot i koné bien li lé dann la panssé shak kominiss rényoné, dann la réspirassion shakinn rantre nou. Kan ni lèv ni panss ali, kan ni dor ni panss ali, anplin dan la zoiné ni panss ali ankor. Mon péi bienémé ! Mon lidantité mi souète aou lo méyèr pou l’ané 2023.

Ni pé galman souète lo méyèr pou bande pèp néna mèm poin lo droi égzisté ; bone ané bande shagossien, bone ané bande palèstinien, bone ané bande migran parpiyé partou dan la mèr, bone ané bande viktime la sossyété injust an éspèran lo méyèr lé dovan zot é ké zot va trapé dann in tan fitir.

Astèr si nou téi panss in pé toussa d’moune léssé-pour konte dann la sossyété néo-kolonyal. Sak la poin travaye, sak la poin sak in pé i apèl linstrikssyon, sak la vi sé in gro syèl noir avèk pététe tazantan inn-dé tash blé mé si tèlman pti pé. Mi souète azot lo méyèr dan la vi… é si lété zot lo rézèrvoir d’rézistanss noute lidantité d’rényoné.

Alon panss in pé toute sak lé malade, toute sak néna la movèz shanss, toute sak lé dann dèye, dann shagrin épi dann la dépitassion, toute noute bande konpatriyote dan la mizèr an souètan zot va tir zot tète dsou d’lo kant mèm — Bondyé va fini par piss dsi zot tète. Anfin mi souète azot la bone érèz-érèz.

A bon antandèr, salu !

Justin