Yèr té la fète dé pèr é pou moin konm pou d’ot in lokazyon rofléshi in pé dsi nout papa vivan sansa décédé. Biensir, mi pans, zot konm moin, ni aprésyé pa tro lo karaktèr komèrsyal demoun i done la fète-la. Si sé solman lokazyon pou gingn in kado sansa poufé in kado, si sé solman lokazyon manz in boushé ansanm, pass in zourné, zot va dir amoin ni oi pa ditou lintéré in n’afèr konmsa é fransh vérité, moin sar dakor sanm zot.
Mé si sé pou raviv in santiman nou l’avé sansa nou néna pou in l’ansien. Si lokazyon lé bon pou rapèl lé shoz la fine éspasé dopi lontan é kékpar rofé lo shomin i amenn anou dopi nout zansète an pasan par d’ot zansète épi ariv ziska nou mèm. Si lokazyon lé bon pou ésplik tousala nout zanfan é pou bann pli ansien z’ot tizanfan é konmsa fé pass an rolé la mémoir. Mi pans lé valab in zourné konmsa.

Astèr, mi souète pa i prézant lo pasé an pli zoli, dir tout lété roz, é tout lété méyèr ké koméla. Pars in pé i di sa, mé kan zot i di la vérité pou vréman, ou i apèrsoi lo zoli tan lontan lété pa touzour si zoli ké sa. Mi vé pa non pl k’i roprézant lo passé an pli mal ké li lété mé si néna in vérité dann la mémoir i vo myé di vérité – la, pars lé pa nésésèr trafik la vérité é sa i ansèrv pa arien, é si sa i ansèrv pa arien lé pa itil pou konstrui la mémoir bann désandan.
Mé antansyon, souvan défoi néna bann zoli lézann fé par mi koné pa kisa é k’i rann lo pasé pli akséptab ké li lété pou vréman, épi k’i ède anou rafréshi limaz nout pasé rann ali in pé pli prézantab. Pou koué zot va dir amoin ? Pars sanm pou moin bann zoli zimaz, bann zoli mizik, bann zoli souvnir, i ède anou tienbo nout pasé dsi lo dik dir nout mémoir vèk lo bi d’transmète sa pli tar.

Alé ! Mi souète in bone fète dé pèr, an rotar lé vré, mé in pé tar lé méyèr ké zamé.- vyé motar ké zamé (zot va éskiz amoin lo kontropètri)