A ! biensir lé pa kékshoz fassil mé lo marmaye la fé sa, i fo dir li néna inn bone doz talan é son biltin dsi lo tan lété intéréssan par son éstil épi par la rishèss son langaz. Total ni pé dir sé inn rishèss siplémantèr dann la manyèr ansèrv nout lang promyèr.

Ni pé azout ankor dsi lo mèm radio dopi plizyèr moi néna galman lo kozman gro-momon é sé kékshoz i intérèss demoune pars bann zékoutèr la radio i téléfone épi i di zot poinn-vizé dsi lo kozman in animatriss la shoizi é mèm tazantan sé lo piblik k’i propoz.

Toussa lé intéréssan, lé mèm amizan sirtou ké lo radio i akèye bien sak i kominik an franssé konm sak i kominik an kréol.

Astèr mi pé dir azot, pou mwin k’i ékri an kréol dopi dé zané é dé zané dann Témoignages, lé pa fassil tienbo la rout san molir dann la diré. Nout lang i mérite sa bien. Nout pèp i mérite sa bien mé tazantan la fatig i pran aou é ou lé a dmandé si i fo kontinyé osinonsa arété. Wi pé an avoir la foi mé tazantan lo sindrome la paz blansh i monte dsi ou.

Alé ! Bon kouraz sak i fé sa épi bon kontinyassion. Mi panss bann zékoutèr sar o randé-vou.

A bon antandèr salu !

Justin