Mi pans bann léktèr témoignages épi bann moun vréman progrésis dann La Rényon i doi konète déza sa. In délégasyon plis in douzène pèrsone i rann anou vizit. Kisa I lé banna ? Moin lé sir nout bann léktèr i koné sa mé la pa initil rapèl lé shoz.

Ousa i lé bannzil Chagos ? Zot lé dann l’oséan indien konm nou. Néna rant La Rényon épi Chagos dé mil kilomète l’oséan. Kisa i lé bann chagosien ? In bann moun lété shasé d’zot péi dann lé z’ané 1970 pars bann zamérikin an konplisité avèk bann z’anglé la désid fé in gran baz militèr dann l’oséan indien. Diégo Garcia ! Pou kosa in baz militèr ? Pars l’amérik konm l’anglétèr son mèm konplis néna bann z’intansyonn d’guèr isi dann l’oséan indien.

Pou kosa bann chagosien lé l’il Moris, sansa dann Sésèl, mèm in pé dann l’Anglétèr ? Pars bann z’amérikin la domann l’Anglétèr vide bann Chagos avèk tout son zabitan épi donn l’inprésyon demoun l’avé zamé abite dann péi-la. Pou sa, la tyé lo bann zanimo-la bril lo shien dann bann four pou bril la paye koko. Pou sa, la fèrm bann lékol, bann dispansèr. Pou sa l’arète fé vni bann marshandiz dann bannzil Chagos. Mèm la di si bann Chagosien i aksèp pa kite z’ot péi la guèr i sava pété é demoun i sava mor dann péi-la.

Kosa i pé fé dann in ka konmsa ? Rézigné ? Larg lo kor ? Sansa rézisté. Bann Chagosien la shoizi lo shomin la rézistans é dopi dé z’ané é dé z’ané zot i sèye fé z’ot méyèr posib pou rotourn viv dann z’ot péi. Nou ladan kosa ni fé ? In kékshoz natirèl, in kékshoz normal, sokour nout bann frèr épi nout bann sèr pou ède azot pou rotourn shé zot. La solidarité, sa sé in n’afèr vréman natirèl.
Bann Chagosien i vien pass in somenn avèk nou. Pou kosa ? Pou inform bann Rényoné dsi z’ot lite. Pou kosa ankor ? Pars nou la fé in l’asosyasion pou fé konète z’ot lite bann Rényoné é pou domann bann Rényoné pou ède azot dann z’ot konba. Bone somenn bann Chagosien, dann l’amityé épi la solidarité avèk bann Rényoné.