Mèrkrodi, dan l’apré-midi, moin la parti avèy in sérémoni par rapor bann zanfan La Krèz. Tout sak la lir nout zournal yèr i koné sérémoni mi anparl là. Konm mi sipoz zot i koné lo problèm bann déporté La Krèz, viktime konm in bonpé Rényoné la politik gouvèrnman la droit la améné pandan plis vint-an é tout lo déga sa la fé La Rényon... Kan mi di toulmoun lé o kouran, pétèt mi angaj amoin in pé tro, pars na sak lé bien o kouran, sak i koné in pti pé, sak i koné in pti myèt, épi sak la antann anparlé in pé vagman. Arzout èk sa sak i trouv bon bon léskiz pou l’Éta, sansa pou la droit, sansa ankor pou ladministrasyon.

Donk moin té là apré parl dé shoz é d’ot, konm i di, avèk in moun mi koné, pars na in n’afèr mi aprésyé, sé kan bann zotorité i done aou in l’èr épi i réspèk pa lo lèr, é ou i rès là konm jatandré, a domandé si ou i rès là, si ou i sava. Donk moin l’atann, konm lé zot, é momandoné, na in moun i di dovan moin, ladministrasyon dann tan-là l’avé sirman bon zintansyon fé sak zot la fé, mèm si lo rézilta té pa sak zot té i majine... Moin noré du ramas mon lang pars kan i di amoin dé shoz konm sa, tou zis si mi rod pa toufé.

Pou koué ? Pars déport bann zanfan, mèm bann ti baba par konvoi, trèt sa konm la trété, abiz d’si la féblès bann paran, bann marmay pou promèt azot in l’avnir roz épi pa réspèk la promès, sanm pou moin la poin in bone intansyon la dan, i pé pa an avoir. Pars moin la lir in pé sak bann déporté la ékri, moin la ékout zot kozman, moin la rogard lo film William Cally é mi pé dir lété konm in gèr ladministrasyon la fé bann Rényoné. Pou vid La Rényon, tanpir ki pé, in bon kantité d’moun, épi gingn la viktoir kont bann partizan lotonomi.

Si ou i koné pa la politik dann tan-là, ou i pé pa konprann lo problèm la déportasyon bann zanfan, i fo byin konprann, solon moin, té zis pou mèt atèr la kapasité rézistans lo pèp rényoné dan son konba pou la libérasyon. Bone intansyon ? I fo pa alé rod sa la-dan.

 Justin