Dopi dé zané é dé zané, nout parti i poz bann késtyonn fon pou La Rényon épi pou bann rényoné é oplis l o tan i pass, oplis bann késtyon-la lé irzan an mèm tan ké fondamantal pou nou rényoné. Pou bann léktèr Témoignages épi bann kamarad lété la dann nout dé-troi dèrnyé kongré bann propozisyon mi anparl sa lé ékri dann in pti liv dsi lo vinn-sink propozisyon nout parti i fé pou shanj la sityasion shé nou.

An parmi, néna in propozisyon i poz lo problèm la sékirité alimantèr-in pé i apèl sa l’otonomi alimantèr. Sa sé in propozisyon k’i aral amoin pou plizyèr rézon : inn, ni koné lé posib trapé, dé i pé fé avans la lite kont lo néokolonyalism, troi li pé amélyor bien konmkifo nout vi isi shé nou, kat li pé pèrmète in bon kolaborasyon rantre nou épi bannzil loséan indien. Ala pou kosa, mi di é mi rodi sa sé in rovandikasyon fon pou nou rényoné é ni doi fé avans sa.

In n’ot afèr mé o-fon sé lo èm zafèr dann mon tète : yèr matin moin té apré ékout la radyo dann mon kok loto é moin la antann in moun apré di , li la lans in pétisyon pou in péi bio isi shé nou.- lo promyé il bio dann loséan indien. Aprésa, li la di, ziska yèr néna par-la trant sis mil pèrsone la fine sign son pétisyon. Biensir inn-dé té pour, d’ot la krétik ali, mé sak lé intérésan sé ké bann kritik zot mèm lé pou in konsomasyon produi lokal, é d’apré moin, inn konm l’ot, sa lé bon pou nou rényoné konsomatèr épi prodiktèr.

Zot i koné mé zami bone z idé, sa i di fé zot shomin é la plipar d’tan shomin trasé par nout bann kamarad kominis dopi in bon koup de tan. An pliské sa, zot i pé fé zot shomin, a kondisyon nou rényoné ni pé métriz nout dévlopman. Sansa sé kozé la boush rouvèr.