Mézami, mèrkrodi soir mwin la rogarde in lémission dann télé dsi bande zanfan la Creuse é sa la rapèl amwin in modékri mwin la fé lo 3 déssanb 2020 dsi so késtyon-la. Son tite : Bone zintanssyon ! Bone zintanssion ! alé marshé don. Mi rapèl dann tan-la l’avé anparl toussa bande moune la mète la min ansanb pou égzil noute bande zanfan. Mi panss zot la pran lo lassansèr sosyal pou zot sal boulo é bande famiye épi bande zanfan, in martir pou zot. Ala mon tèks :

Dabor mi pans toute sak la roganiz lo bumidom issi La Rényon é zot la si bien fé zot boulo ké la popilasyon rényonèz la dékante in pé é par la mèm okazyon zot la nyabou anpèsh la révolisyon : médaye pou zot ! Ferm lo ban.

Aprésa mi panss bann foiyé téi fé d’issi d’laba-la pouponnyèr sa lété bien koni sa – pou ramass zanfan d’moune épi prépar azot pou alé dann foiyé la Ddass dan la franss. I mérité azot in bon médaye pou lo bon travaye la fé : médaye pou zot ! ferm lo ban.
Mi panss ankor toutt so bann moune an avanss par raport lo planning familial, si tèlman an avanss ké zot la ansèrv tout kalité téknik, tout kalité produi pou élimine bonpé néssanss. Fini la gloire zanana tann sansa fèye zavoka – tann, bann moiyin modèrn té la : médaye pou zot é pou sak la ansèrv sa ! ferm lo ban.

Aprésa mi pans lindistri ti-baba laba Sin-Bénoi. Sa i mérite in bon rékonpans pars grass azot la gingn diminyé in pé la préssyon démografik : médaye pou zot, i mérite azot. Ferm lo ban !
Mi pans ankor tout bann santr formasyon la prépar nout bann jenn fiy pou alé sèrv bone pou bann bon famiy franssé : zot i mérite in bon médaye : ferm lo ban !
Mi panss ankor tout bann travayèr rényoné soupéyé la parti soulaz lo rin bann travayèr franssé é bann sèrviss la migrasyon la nyabou fé so léksploi. In bon médaye i l mérite azot ; fèrm lo ban !

Médaye pou travayèr sosyal la fé sign bann famiy in déklarasyon d’abandon. Médaye pou sak la sépar lo frèr avèk la sèr, avèk la momon ; Médaye pou sak la rakonte bann famiy zot zanfan i sar vni doktèr épi rant an vakanss in foi par an. Médaye pou sak la donn in nouvo lidantité bann zanfan rényoné. Fèrm lo ban ! ferm lo ban ! ferm lo ban !
Médaye pou tout konpliss so gran l’antropriz diminissyon la popilasyon rényonèz. Bone zintansyon ! bone intansyon ? Alé marshé don. Mon k..bone zintansyon !

Justin