Dabor mi pans tout sak la roganiz lo bumidom issi La Rényon é zot la si bien fé zot boulo ké la popilasyon rényonèz la dékant in pé é par la mèm okazyon zot la nyabou anpèsh la révolisyon : médaye pou zot ! ferm lo ban.
Aprésa mi panss bann foiyé téi fé d’issi d’laba-la pouponnyèr sa lété bien koni sa- pou ramass zanfann d’moun épi prépar azot pou alé dann foiyé la Ddass dan la frans.I mérité azot in bon médaye pou lo bon travaye la fé :médaye pou zot ! ferm lo ban.
Mi panss ankor toutt so bann moun an avanss par raport lo planning familial, si tèlman an avans ké zot la ansèrv tout kalité téknik, tout kalité produi pou élimine bonpé nésanss . Fini la gloir zanana tann sansa fèye zavoka- tann , bann moiyin modèrn té la : médaye pou zot é pou sak la ansèrv sa ! ferm lo ban.
Aprésa mi pans lindistri ti-baba laba Sin-Bénoi . Sa i mérite in bon rékonpans pars grass azot la gingn diminyé in pé la préssyon démografik :médaye pou zot, i mérite azot.ferm lo ban !
Mi pans ankor tout bann santr formasyon la prépar nout bann jenn fiy pou alé sèrv bone pou bann bon famiy fransé :zot i mérite in bon médaye :ferm lo ban !
Mi apns ankor tout bann travayèr rényoné soupéyé la parti soulaz lo rin bann travayèr fransé é bann sèrvis la migrasyon la nyabou fé so l(éksploi.In bon médaye i lmérite azot ; fèrm lo ban !
Médaye pou travayèr sosyal la fé sign bann famiy in déklarasyon d’abandon.Médaye pou sak la sépar lo frèr avèlk la sèr , avèk la momon ; Médaye pou sak la rakont bann famiy zot zanfan i sar vni doktèr épi rant an vakanss in foi par an .Médaye pou sak la donn in nouvo lidantité bann zanfan rébnyoné. Fèrm lo ban ! ferm lo ban ! ferm lo ban !
Médaye pou tout konpliss so gran l’antropriz diminisyon la popilasyon rényonèz. Bone zintansyon ! bone intansyon ?Alé marssé don. Mon k..bone zintansyon !