Si zot néna la kiryozté d’alé rode avèk kissa nout péi i ashté son nésséssèr, so kou issi zot i rogard ar pi dann loséan indien mé dann l’érop épi dan La franss. Sirésèrtin zot va dir wala kékshoz lé pa tro normal. Pou kossa i sava ashète shèr, pou kossa i ashète loin plito ké pré épi méyèr marshé.

Mi rapèl, fitintan Prézidan Sarkozy l’avé anparl lo dévlopman andogène é mi panss sa téi vé dir pliss d’ésjhanj avèk nout bann voizin zéografik, é sa téi doi pèrmète pèrde mwin d’tan pou lo transpor, pèrde mwinss larzan, é konm i di in dévlopman gagnan-gagnan, rant bann vandèr épi bann kliyan.

Mé wala la miniss bann péi l’outremèr — Sarkozy l’avé nonm sa ! — l’avé kalkil sé in manyèr vann pliss produi franssé avèk bann gran péi lé dann nout lanvironeman… Inn fasson gro doi po dévir lo do avèk lo prézidan é pou inn miniss de droite lété pa zoli-zoli é anpliss sa téi déboush dsi in ranforsman lo sistèm néo-kolonyal.

I fo dir galman Sarkozy l’avé promète réoriente in bonpé zafèr dann bann péi loutremèr. Lé vré li la pèrde zélékssion é pi bann sossyaliss la vni apré li lété pa mwinns néokolonyalist ké li. É pou mwin zot lé ankor zordi.

Lo tan la passé, nou lé touzour dann in sityassion d’maldévlopman é la pa domin nou va ansort de la. Sirtou kan bann zélite politik La Rényon i kontante azot fèr sak zot i fé koméla san vanj pou lo dévlopman.

A bon antandèr salu.

Justin