Na poin tro lontan, prézidan Sarko la parl dsi son avnir. Li la di konmsa, si li gingn pa z’éléksyon moi d’mé, i antann ar pi parl dé li. Li va kit la politik... Zédi soir, li la rodi lo mèm zafèr. Mèm li la di lo zournalist, i pé poz ali lo mèm késtyon inn, dé, troi foi, li va fé lo mèm répons. Lé in pé bizar, in boug lé angajé dann in konba, olèrk kriy : "Tyinbo la pa largué !", i di in n’afèr konmsa. Pars demoun lé riskab majine lo ga i kalkil déza li la fine pèrd la parti.

Solman, konm Sarko i fé pa arien san bien kalkilé, i pé di, kosa i spas ankor dan son tèt ? Pétèt li majine demoun va konprann li sé l’om providansyèl, pars lé zot, sanm pou li, i vo pa arien. Pétèt li di dan son fonnkèr, bann Fransé va santi azot konm orfélin, konm z’anfan na pi papa, na pi momon, é va réfléshi avan bat ali a-tèr. In kalkil ? Mé mi koné pa si sé in bon kalkil, pars in pé i pé di, alon fors ankor in pé, nou va nyabou kapot ali dann fon. D’ot i pé di, koz touzour, shant ton kont, zordi ta fèt. Sinonsa, li lé konm in moun i prévien bann Fransé, domin zot va rogrété, pars in nouvo sar zamé in moun kapab konm li ! Dizon, konm in paryaz dsi l’avnir.

Bien bon ! Mé anon oir pou kosa li lé bon ! Tout sondaz i amontr la mazorité d’moun i pans son mandatir lété sèt bann rish kont bann pov. La pa arienk bann sondaz, lo bann shif galman i amontr bann rish la vni pli rish é bann moun o-flan la vni plis o-flan. Alor di sak li di, mi pans pa bann shomèr va pléré dann fon zot kaz, mi pans pa non pli bann vièy pèrsone va pléré, épi arzout èk sa tout sak la vi zot sityasion dégradé. Moin lé sir, dan la kaz bann rish, demoun sar tris vi k’la mashine pou anrishi nora détraké. Konm in liv l’ékrivèn Françoise Sagan i di dan son tit : "Bonzour tristès !".

Justin