Accueil > Chroniques > Oté
Borde pa la kiltir popilère, sansa sé ou ké lé riskab d’ète bordé
Lamontraz la lang
mercredi 29 septembre 2021, par
Mézami, mon bande dalon, mi rapèl in zour in gran lamontrèr linivèrsité La Rényon,la domande awin pou amontr nout lang kréol rényoné bande zétidyan . Mèm mwin téi koné pa koman i fo fé, mwin la di oui, pars sa lété kant mèm kékshoz téi ral amwin bonpé.
L’èr-la mi kalkil é mi kalkil mèm, mi poz késtyon dann mon tète, épi mi rode lo méyèr répons. Mi rode dann mon souvnir koman mon bande méyèr proféssèr téi fé pou amontré. Mi di dann mon kèr si mwin néna in bon souvnir banna sé ké banna la réissi amenn amwin dann shomin la konéssans . Akoz, mwin ossi mi ariv’ ré fé pou lé zot sak zot la fé pou mwin ?
Lo tan la passé é mwin la aranz mon kour méyèr fasson mwin la gagné mi panss :la lang kréol, la kiltir kréol, la tradiksyon kréol-franssé é franssé-kréol, lo bande tèks é sirtou sak bande zétidyan zot mèm téi fé. koman koman mwin la komanss débrouye mon kari é sanm pou mwin, mwin téi romarke in sèrtin dogré la réissité an parmi bande zétisyan.
In zour néna in madame, mètrèss lékol, bonpé pli kalifyé ké mwin la dmande amwin si èl i pé assist mon kour.Mi di oui, mé dann mon kèr, mi panss kossa demoune kanifyé konmsa i vien fé dann mon kour é sirtou kossa i rode ké mi konétré pliss ké bande moune formé..El la vni inn-dé foi : avèk bande zétidyan nou la travaye la lang, la tradiksyon épi la kiltir,la prodikssyon, toute kalité la prodikssion..
Dèrnyé kou èl la vni, èl la dmande amwin pou kossa i fé rante la kitire popilère dann l’amontraz la lang ? Miwn la réponde aèl :la lang sé lo zoutiye, é avèk lo zoutiye i produi dé shoze : sé bande shoze-la ni pé apèl la prodikssyon é dann bande produi néna la kiltir popilère. San la lang na poin la kiltir popilère é san la kiltir popilère na pi la lang…
Akoute amwin bien ti-madam sanm pou mwin dann ninporte ékèl lang, la kiltire popilère sé in shomin obligatoire.Borde pa li sirto pars si wi borde ali, lo pèp lé riskab b orde aou.
Justin
