Donk Bordeaux konm in bonpé vil dan La franss dèrnyé zéléksion la shanj mèr é la komine la désside fé in plan pou trape lotosifizans alimantèr épi kékshoze i apèl la rézilyanss alimantèr, pou gingn siporte lo shok bande difikilté i mank ar pa d’ arivé si wi tienbo konte bande shajman klimatik i ménass banna plizanpliss, konm i ménass anou issi dan noute péi.

An parmi zot déssizyon néna sak zot i apèl in miltiplikassion bande projé nourrissier – pou nouri lo moune si zot i vé – dann la komine èl mêm épi dann bande komine lé zalantour. Biensir la pa sèrtin zot néna la tèr an sifizans mé zot i panss laba dé shoze ké ni majine pou nou ossi :

Konm dévlope band park, zardin épi éspass vèr san obliye produi bande frui épi bande léguime pou demoune manzé… La pa ariv azot majine an passan dann in gran léspass vèr, dir dann zot kèr nora té myé plito ké pyédboi i ansèrv pa arien pyé fruiyapin, pyé mang, pyé prune épi d’ote pyé d’boi bien itil. San obliye bande flèr épi bande plante a manzé.

Bien antandi sak i risk manké sé la tère an kantité épi sirtou demoune pou travayé. Zot i baze dossi 829 éktar mé zot na poin dann zot komine sé pou sa zot i panss intérèss lé zot komine néna zot ossi la tère lé pa mi an valèr. Mi konpran sa konm in ko-dévlopman rante plizyèr komine pou trape lotosifizanss épi la rézilyanss alimantèr.

Pou kossa mi di azot sa ?

Pars néna in momandoné mi panss sar obligatoir ni mète bande zinstitission épi bande zélu dovan zot résponsabilité. Pa arienk gouvèrnrman la franss mé ossi bande zassanvblé i roprézante la popilassion… Domin, avèk apré domin, i prépare dopi zordi é si ni prépare pa v’ariv l’ère nou nora pi do koi nouri noute popilassion… Azot bande nouvo kandida épi bande fitir zélu, kalkil in kou lo poi i pèze dsi zot zépol. Zordi zot lé jenn mé v’ariv lo tan lansyène zénérassion nora lèv lo pyé malérèzmman san prépar l’avnir konm k’i fo.

Alor ni poze sinploman la késtyon : akoz nou ossi ni prépar pa l’avnir, konm in pé partou lé zom é lé fam progré i fé é konm mi di souvan dé foi lotosifizanss alimantèr, avèk la rézilyanss sa sé in késtyon kapital pou nou é sé la zénérassion montante k’i doi prande sa an par so résponsanbilité-la.

Si banna i panss sa par koté Bordeaux, pou kossa issi La rényon ni panssré pa ossi.

A bon ékoutèr, salu !

Justin