Mézami, Mon bann dalone-dalon, konm zot i koné Boris Gamaleya la rotourn dann nout péi, inn-dë zané apré son mortalité laba dan La franss -son mortalité fizik ! Pars, é mi tonb dakor avèk Elie Hoareau ,kan li di Boris i mor ar pa zamé …Par raporte son parkour d’vi, mé d’apré sak mi kroi li l’amenn plizyèr vi kissoi inn déyèr l’ote, kissoi an mèm tan, an rèv,an kochmar , an réalité, an akssyon épi an kréassion.

Si zot i domann amwin si mwin lété in moune prosh par rapor a li, m’a réponde azot : « Non li lété pa prosh de mwin é mwin lété pa prosh dé li ». Dayèr mi rovandik pa arien, é mi panss ké li son koté li l’avé pou mwin la konsidérassion k’in jéni konm li i pé an avoir pou in zéro la gosh d’in shif.Mi panss mèm ké apré in pti boute tan , li la du ranj amwin dann la poubèl sa mémoir é lé pli préférab konmsa.

I anpèsh pa ké lé pti pé lokazyon mwin la kotoiye ali, i konte pou bokou pou in moune konm mwin. Promyé zimaz sé kan li l’apré lir in fonnkèr kan François Coupou lé mor avèk lo kou bande kass an fèr- kolonyalist assassin-Mi rovoi ali kan li la pran l’aviyon pou alé dann légzil lordonans oktob 60 é mwin té pa la konm égzilé mé sinploman pou aporte mon solidarité.

Mi rapèl ankor Boris kan li lété apré forje lékritir oktob 77 avèk nou konm in groupe dalon pou atande léklozyon lo lékritir noute lang kréol La Rényon-sa la si tèlman mark amwin ké zordi ankor 44 zané apré mi kontinyé ékrir prèss konmsa.

Mi antrovoi ankor détroi piblikassion avèk bande tèks Gamaleya kan mi aparète, mi rapèl pi pou kossa, konm diréktèr la piblikassion*.Dann tan-la mwin téi rèv d’ète in lintélékstyèl rényoné-koméla mwin lé ziss kontan d’ète in rényoné.

Final de konte mwin l’avé la shanss viv dann in tan konmsa é si léspri Boris i plane an-o laba é ké mwin konm d’ote nou lé la pou anparl de li, mi panss lé bien d’an parl in gran pèrsonaz konm li-imortèl sirman é marké pou touzour dann tablo d’onère nout pèp rényoné.

*La mézon d’édition téi apèl REI(Réunion Edition impression) é sa téi aparien bande kominist rényoné.

Justin