Sa in kozman nout tout i koné é nout tout i pans sa lé vré. Normalman oui pars la plui i tonm pa a titré toultan-toultan. Souvan dé foi la plui i dir lontan. Sépa si zot i souvien siklone Hyasint ? Moin néna dann mon tète la plui la tonm vintéin zour kaziman san arété, mé i fo pa romont l’ané 1980 pou artrouv in sityasion konmsa. L’ané 2018 lété pa mal non pli dann son manyèr é anplis l’androi la plui i tonm près pa dabitid. Solman vi k’sé in provèrb lé pa inn késtyonn solèye, d’bo tan, d’mové tan, d’plui, sé sinploman in l’ankourajman pou pran pasyans pars lé shoz i pé aranj avèk lo tan.I di pa : « La pasyans i géri la gal ? ». Alor, alon pran pasyans kan k’i fo. Alé ! Mi kite azot rofléshi la dsi é ni arrouv pli d’van. Sipétadyé !