Dann in matsh, in lékip i vé an avoir in rézilta. Sa, sa lé sir ! Pou gingn in bon rézilta, i fo shakinn i zoué byin son rol konm k’i fo. Na poin pou rodir la-dsi ! Si i fé konmsa, si inn i soutyin l’ote, dizon konm lo zo i soutyin la shèr, si toute z’ékipyé lé paré, lé désidé pou zoué lo rol, lé shoz i pé byin s’passé. Mé si in pé lé pa d’akor inn avèk l’ote déssi lo bi k’i fo avizé, déssi lo rol shakinn i doi an avoir... si inn i ral in koté, l’ot in n’ote koté, lo z’afèr lé mal baré, é lé pa sir ariv o bi.

Lo bi nout péi i doi trapé — i rossanm tou l’moun i doi z’ète dakor —, sé lo dévlopman dirab. Pou trap sa, nana in bon pé partnèr. Shakinn i doi byin konète son partisyon. Shakinn i doi fé lo travay k’i atann dé li... Konm di lo konte, si lo matsh lé séré, i fo zoué séré, i fo pa fé dantèl, sirtou si, san k’i atann, nana in kriz in pé pli for i ariv...

Si, par ébzanp, "l’Etat local" i zoué pa byin son rol, si son shèf, méssyé Préfé, i pran ali pou in shèf l’UMP, pou in shèf parti. Pli pir, si li kroi li nana konm missyon d’ranvèrs la diréksyon la Réjyon... mi ardi, sa sé in légzanp !... lé shoz i pass ar pa pou lo myé. Si d’ote partnèr, zot ossi, nana dann z’ot kèr in l’intansyon k’i tourn lo do avèk l’intéré nout pèp, sar pa byin non pli. Pou mon par, konm pou toute bann ti-kolon, sak i konte, pou nou, la pa koman i règ bann dézakor dan le l’ékip, sansa dan lo bann z’ékip, sé bou-di-kont, si ni pé gingn trap in bon rézilta, lo méyèr rézilta possib.

Justin

Lo zo i soutyin la shèr : la solidarité dann famiy

In min i lav l’ote : la solidarité galman

In n’afèr malbaré : lé pa sir ariv o bi

L’état local : moin la antann sa dann diskour lo Prézidan la France

Fé dantèl : fé romark aou, mé san rode zoué byin out rol