Mézami, méssyé, médam ; la sosyété lo tan la bokou shanjé dsi la késtyonn boubou. Lontan kan ou l’avé in boubou – sirtou in bou zarab - dizon ou té kondané a pèrpète. Boubou la l’avé épi d’fin. Mète ali dann los ho avèk do sèl, fé in bain kol-ko guéri vite, pran tizane zèrbaz, rien a fèr. Avèk boub ou – la ou lé angajé dann shomin d’damas é wi koné pa, mèm pèrsone i koné pa koman wi sava ansorte aou. Mé la, n ou lé dann in provèrb-la, i anparl boubou mé sé pou koz d’ote shoz. Konm par ébzanp domoun néna lo kèr maléré ; zot i souplègn toultan é si zot néna in vré sansa in fo tablatir, tablatir-la i trène an longuèr ; wi diré zot i égziss arienk par sa, é si zot i débarass azot de sa, zot lé riskab pèrde zot pèrsonalité-zot i pèrde par l’fète sak i rand azot romarkab. Alé ! Mi kite azot rofléshi la dsi é ni artrouv pli d’van. Sipétadyé.