Dann a pinn in sominn nou sora lo 20 désanm, in gran fèt pou nou tou lé zan, zour la, mi sar pa détay a zot kosa i lé lo 20 désanm pou nou rényoné, pou nout tout, zot tout i koné nout listwar. Zis pou dégrosi in pé, lo 13 oktob 1948 Sarda i débark lil bourbon, vik sé konm sa té i apèl nout lil an so moman la, é la li la proklam labolisyon lésklavaz lo 20 désanm minm lané. Lo zour la minm li libèr 62000 zésklav. Banna lé anfin lib i di. Mé néna in takon késtyon y rovyin souvan la d’si, Koman banna té trété ou plito maltrété ? Si néna ankor zésklav partou zordi ? Mé sirtou sé ki ousinonsa sé koué in zésklav ? Pou réponn sinploman ni pé di, in zésklav sé in moun li lé pa lib, li trava bokou li lé pa péyé boudikont li travay pou la po patat si ti vé. Pou fé gonf lo pla son mèt.

Dikou li lé la propriété in ot moun i apèl lo mèt, é konm li lé lo byin in ot i pé vann a li, i pé ahsté konm si lété in marshandiz, in mèb. Pou lo trafik zanimo, té i apèl sa fé lo makignon, mi sipoz pou domoun té apopré parèy. A mon manièr a mwin osi mi sèy éspliké. Anparmi d’moun néna in i réponn a mwin, donkalor si mi konpran byin, lo lésklav néna son valèr li, vik i ashté a li par rapor li nyabou fourni in travay. Sa minm-minm mi réponn. La, li pèrd pa la kart li di, Bé a mwin zordi mwin soré mwin kin zésklav lontan ? Poukoué ti di sa ? Bin zordi i ashté pi vik na pi travay pou fé. Rant la dan ou.

Pran mon ka pèrsonèl, mi travay pa, mi gign 311 euro par mwa, ala mon valèr ? Banna la di mi vo pa plis. Eské dan mon ka a mwin pèrsonèl, mi pé konsidèr a mwin in sèl néstan konm in boug lib ? Dikou li la toush a mwin kartoush, ou li vé alé baya ? Lé vré pou vréman, kan ou rogard dolwin konm sa, nout tout lé in pé lib mé boudikont kan ti rogard dopré, nout tout lé pa lib parèyman, néna nana in gran, gran libérté minm par rapor o zot. Dikou a mwin osi mi komans douté, mé mi mankra pa roprann a mwin, in gran bononm i apèl lénine la di « Dann in sosiété ou larzan i komann touzour i pé pa an awar de “Libérté“ réèl é véritab »