Mi arvyin zordi d’si lo rapor Lurel, lo famé rapor pou légalité réèl, sra pa lo dérnié fwa ni anparl télman néna pou di, nou nora sirman lokasyon arvni d’si pars konm si pou mwin ni sar fé boudin dann vant koshon. Lurèl, li di, késtyon légalité, néna in gran lékartman rant nou èk déor, pa aryink nou, Martinik - Gwadloup Guyann tousala. In lékartman d’si késtyon lanplwa, aryink pou nou, nou néna trwa fwa plis shomaz ké déor. Apréla, lo lozman, lo transpor, nout lékol, lilétris, la povroté……

Li propoz pou fèrm in pé lékartman, li propoz, disi 2040 shak départman, shakinn par li minm, d’si son téritwar li mèt an plass in politik i tyinbo kont son éspésifisité. San manti, lé vré ant nou é déor néna pou galizé. Poukoué mi di “Ni sar fé boudin dann vant koshon“ ? Sa sé sak Lurèl i di, mé kipé di a nou si Lurèl i kont ankor lané proshinn ? Li pé èt ankor la, konm li pé pa èt ankor la.

Mi ékout lo prézidan “Les républikin“. Ni koné, na-dé-fwa son lang i fé kontour, sanm pou mwin li rokoné pa li ditou dann lo légalité réèl, sak Lurèl, pito li di i fo fé 400 million lékonomi par an aryink d’si bann départman loutromèr. Dizon i sar dépouy in moun touni. Konm mwin la konpri, si banna i rovyin, lo légalité réèl i sar èt largé an plan. Pou lèr ni atann, mé ni kont pa tro.