Zot i koné néna vis é vis. Inn i vé dir léspri tort vèy pa. L’ot i vé dir néna bonpé vis, sansa boulon dann lo mékanik. Mé kan ou i di in n’afèr konmsa, final de kont ou i zoué avèk lo mo : zé d’mo, sa i mank pa dann la lang kréol é si la pa zé d’mo, sé in manyèr détourn lo sans in mo. In légzanp : lo mo balo, in sort sak vakoa pou mète léstshi d’dan, mé kan ou i di in fam la ramas in balo la pa ditou lo mèm z’afèr. Si zot i lir in léksik lalang kréol rényoné, n’inport lakèl zot va oir bann détournman konmsa néna par milyé. Konm k’i diré in tiktak pou évite di in mo kri mé di lo mèm z’afèr in pé an dousèr. Alé ! Mi lèss azot rofléshi la dsi é ni artrouv pli d’van sipétadyé.