Mézami , mi panss, zot i koné déza kozman-la. Mwin pèrsonèlman, mwin la antande sa kan mwin lété dann ti-klass : Laté pa pou mwin diréktoman pars mwin lété zanfan la déréktriss é mi oi pa in ladzointe dann tan-la maltrète in zanfan la diréktriss. Mé souvan défoi, mwin la konprande lo kozman té pou mwin indirèktoman. Mi pé pa dire azot koman mwin la konprande sa, mé zot i koné marmaye néna souvan défoi konm i di in sizyème sanss- in sanss an pliské lo sink promyé.

Dann tan-la, mi panss mwin lété konm toute marmaye avèk in doze l’intuission, in don pou konprande lé shoze pèrsone la pa di franshman, kékshoze wi pé konm doviné san k’i mète aoul o poin dsi lo i.

Astère kan mi rofléshi bien, mi panss pa sa in provèrbe pou vréman,sré plito in sorte boush-ta-guèl donk in zirman . Sépa si zot i konpran amwin bien dann sak mi di, mé mi wa pa kozman –la konm in provèyrbe avèk son sanns prope épi son sanss figuiré konm ni travaye ansanb dopi dé tan zé dé tan. Mé pétète an kalkilan bien zot sar kapabe dékode lo kozman é ésplike amwin par koman kozman-la sé in provèrbe ;antouléka mi konte dsi zot pou sa.

Alé ! Mi kite azot rofléshi la dsi é ni artrouv pli d’van. Sipétadyé.

Justin