Oté

“Boush an myèl, kèr an fyèl”

In kozman pou la rout

Justin / 13 mé 2019

JPEG - 43.6 ko

Kozman-la, sa in kozman l’Afrik mé isi La Rényon, néna in kozman lé in pé parèye. Li di konmsa : “Dan blan kèr noir”. Moin pèrsonèl mi yèm pa tro lo fason demoun i ansèrv lo ladzéktif noir é sé pou sa mèm mi évite la plipar d’tan ansèrv bann proverb i mète an l’opozisyon lo blan avèk lo noir : inn i diré néna tout kalité, é l’ot i diré néna tout sort défo. An touléka, myèl avèk fyèl I pèrmète anou zap in pé vokabilèr rasis pou dir lo mèm zafèr an final de kont. Sa lé vré pou bann moun néna bann paroli sikré é bann fond kèr amèr. Zot i koné sa i égzis pou vréman mé la pa tout demoun lé konmsa pars néna sak néna kant mèm mové laparans épi mové fon, sansa bon l’aparans épi bon fon. Mé konm mi di souvan défoi in proverb la pa in vérité matématik é konm demoun I di : sé solon lé ka. A par k’sa sé a shakinn dé oir. Alé ! Mi kite azot rofléshi la dsi é ni artrouv pli d’van. Sipétadyé !