Médam zé Mésyé, la sosyété, koz èk moin sé koz èk in kouyon, mé sé o pyé d’lo mir k’i oi lo vré mason. Mézami, mète lindi dsi mardi-i di galman mète la ptit dsi la gross sansa mète la gross dsi la ptit, sé kan in moun i asiz épi li mète in zanm dsi l’ot. Bann zansien téi yèm pa kan demoun té i pran pozisyon-la, sirtou bann fiy. Mi souvienn inn-dé, zot momon la rogard azot gro zyé pou sa : si té la glass té fine fonn. Pou bann bononm sa lété in sign parèss, pétète mèm in sign movèz vi. Mé tan-la lé fine aboli é d’apré sak mi kroi sa i vé pi dir arien ditou. Konm lo kozman « tir kornèr » té i sava souvan ansanm kozman moin la mark an-o la. Mi domann pa zot rofléshi la dsi pars sar sinploman pou la po d’patat. Alé ! Ni artrouv pli d’van. Sipétadyé !