Mézami sépa si zot lé konm mwin mé mi yèmré manzé-boir bann produi La Rényon mé o pri k’i va avèk mon porte-moné . Si pou aplati ali in sèl kou, doboute guète ! Kan mi di produi La Rényon souvan défoi lé tro shèr, mi di pa bann plantèr La Rényon i ramass in ta larzan ladsi. Mi panss mèm souvan défoi bann plantèr i tir lo dyab par la ké pou sèye done anou bann bon produi nout péi. Mwin zanfan pti plantèr kont pa dsi mwin pou fiziye mon papa é tout sak téi travaye konm li, avèk li, é zordi ankor l’apré lité pou zot sirvi.

Zot i koné néna in kantité rézon pou ésplik la shèrté bann produi konm zognon, tomate, l’aye, karote, épi bann frui. Néna lo mank la plui, néna lo tro d’plui, néna solèye kan li pète, maladi kan i monte dossi épi néna bann produi, i apèl sa zintran-sa i sort déor é sa i kout shèr. Mé mi panss la pa sa solman sa é si ni vé di la vérité, i fo ni anpar la spékilasyon. Sé koi ozis ? Sé kan wi vann out prodiksyon ossi shèr ké wi gingn san trakass aou vréman pou lo pri d’rovien.

Si mi diré azot sé bann konsomatèr néna in for nivo d’vi k’i tir lo pri bann produi par an-o. Zot i ansèrv modèl pou bann konsomatèr i gingn moinss mèm trépé, é sak zot i ashté pa, lo bann ti konsomatèr i ashté pa non pli é sak zot i ashté bann ti konsomatèr sa i fo azot absoliman...kan bann pti konsomatèr i dépass pa bann gro an ashtan bann marshandiz ord’pri.Mi panss zot i koné kèl kalité produi mi panss kan mi di sa.

In zour mwin la oz in késtyon : mwin la dmand in moun pou kossa bann produi bio i vann shèr konmsa vi k’i dépanss pa l’angré, i dépanss pa dézèrban, i ansèrv pa bann zinséktiside..La réponss : i dépanss bonpé la min d’èv. Dousman kamarad, bouz pa l’bato, pouss pa l’bato normalman dann bann téknik nouvèl konm la pèrmakiltir, l’agro forèsteri l’aquaponie, mèm lo bio normal i dépanss pa tro pou la min d’èv : sé lo rol la famiy, lo zassosyé,sé landroi la solidarité-in min i lav l’ot. Alor ? Ni vé, ni vé pa, la spékilassyon i zoué ankor ladan. Zot i pans spa ?