Oté

« Bransh doboi i bataye anlèr, rasine i fé kalin an d’sou. »

In kozman pou la rout

Justin / 16 out 2019

JPEG - 43.6 ko

Mi koné pa si kozman-la i di azot in n’afèr mé sanm pou moin na poin in sans kashyété la-dan. Pou ète klèr, li lé klèr, mé la pa pou sa li lé vré. Pou ma par, mi rapèl in zistoir mon granpèr té i rakont amoin : dizon sa zistoir Gasparin-Brunet. Lé dé la, dann tan sa lété in pé bann védète la politik : demoun téi bataye pou sa é si ou la fé in féstin, antansyon ou i invite bann partizan Gasparin épi sète Brunet pars, mèm famiy, kan lalkol i komans shode bann zéspri étone pa ou si in pé i roul atèr. Mèm dann in nos maryaz, si garson in partizan l’inn i maryé avèk la fiy l’ot ébin l’avé danzé. Poitan souvan dé foi lo brui téi kour inn é l’ot lété kopin konm koshon. Alé oir si té vré, si té mantèr mé antouléka demoun téi di. Zot i koné lo patoi téi di : gasparin-briné, gasparin-briné pou dir in gran diskisyon san fin la komansé. Dèrnyé moun moin la antann di sa létélo lansien mèr Sint-Sizane, Luçay Langenier téi di sa souvan dé foi pou fé ri la boush pars li téi yèm bien l’imour. Aprésa, moin la antann parl ankor bann duo infèrnal konmsa mé fransh vérité moin la zamé trouv la prèv a konviksyon. Alé ! Mi kite azot rofléshi la ds é ni artrouv pli d’van. Sipétadyé !