Oté

Bravo aou ! Bravo La Frans kolonyal ! Sa sé tout out kapab sa !

Justin / 3 zwin 2020

JPEG - 43.6 ko

Mi kash pa dir azot, moin pèrsonèl moin la touzour pansé La Frans la vyol lo droi la dékolonizasyon, kan èl la sépar Mayotte avèk lé z’ot zil komor. Moin lé sir, si mi ékri sa, nora touzour in pé pou vol amoin dan lé plime, pou dir konm moin la lir, inndé foi bann komorien sé in bann moun étranj par raport bann maoré... Méinn foi ké bann La Frans kolonyal la fé sa, mi yèmré kant mèm li pran son résponsabilité/si li la nyabou, pou son zintéré, par la manipilasyon, par la koripsyon, artir Mayotte dann l’ansanm komorien, zordi èl néna dévoir par raport bann maoré, par raport lil Mayotte é moin, pèrsonèl, mi pans La shèr é dous frans i asime pa son dévoir konm èl i dovré fèr.

Yèr granmatin, moin la rogard zournal parlé dsi Mayotte la promyèr é moin la vi, ankor in foi, lo sor La Frans i rézèrv bann maoré i bote pa moin ditou, pétète i bote a zot, mé shakinn son gou son santiman.. Moin la vi laba néna in prizon avèk 43 prizonyé é soisanntroi pèrsone la trap lo covid 19 : an in zour, prizonyé konm gardien la prizon. In délégué sindikal la déklar la diréksyon moin mi diré l’étala pa pran son résponsabilité. Moin la vi bann maoré, bann moun bien, apré fé in manifèstasyon pars bann pov é bann kagnar konm i di, i anpèsh azot konsome an pé. Moin la vi galman bann bato d’plézir… é d’plézans avèk in bann demoun bien blan épi bien blon apré prépar zot bato pou lo bann touris ; anfin, moin la vi dé shoz, i rapèl amoin La Rényon é an parmi lékol an fransé pou dévlop la kiltir épi l’ansègnman lo kolonyal i pans lé bon pou banna.

Donk, la konklizyon mi antir ladan, sé ké, si i kontinyé dévlopman Mayotte va bate dsi troi pate konm sète La Rényon émi domann amoinsa lé vré galman pou nou rényonési i ariv in kriz konm lo covid mé dis foi pli for, san foi pli for, mil foi pli for koman la puisans kolonyal va fé pou garanti lo manzé k’i fo, lo lozman k’i fo, lo santé k’i fo, épi lo kiltir k’i vé pou nou. Parl pa lo lékonomi, sète la konm sète zordi La Rényon sar an rade, ébiensir in pé va di La Frans i p épa ramass tout la mizèr di mond. Bravo aou ! Bravo la frans kolonyal ! Ou la bien réisi ! Ou i pé z’ète fyèr d’ou.