Lékip La Zane d’Ark la pèrd : sa lé vré ! Èl a gingn in séryé galo : sa lé vré galman ! In bonpé doktèr i sava kalkil son ka ! Sirtou sak té i asiz son kaz té i rogard balon roulé é té i trouv tout kalité tik-tak bann résponsab épi bann zouèr la pa trouvé... Sa la pa in n’afèr nouvo : toutan sa lé konmsa.

Kossa ? Zot i kalkil moin l’apré kritik bann siportèr ? Zamé d’la vi ! Si na poin siportèr, la poin fotbalèr ! Rozman banna lé la pou done kouraz z’ot lékip épi pou dir galman zot lé pa kontan kan na in nafèr i kontant pa zot. Konm sa mèm in n’éspor popilèr i fonksione.

Mé, mi pans pa nana pou vréman in rézon pou pa ète kontan. Lé ga, lékip Zane d’Ark la fé in bon bout shomin, la zoué zoli-zoli foutbal, la fé gayar-gayar match. Sé sa k’i fo ni mète anlèr, sé sa k’ni doi mète dann nout tète.

Lékip la gingn galo. Mé bann gran lékip i gingn galo parfoi, épi konm di lo kont, lo zour out zétoil i briy, li briy pou vréman, é kan li briy pa, tansion pangar ! Samdi, zétoil té i briy pa pou nout lékip ! Sé la vi, sé léspor lé konmsa.

Astèr, i fo, ou i prépar a ou pou ardémaré : Lantrénèr lé la pou sa ! Bann dirizan lé la pou sa ! Bann zouèr galman épi bann vré siportèr lé la pou sa mèm.
Épi, ni pé dir, souvan dé foi, la viktoir i boush in pé lo zié, la défète i rouv azot. Rouvèr lo zié, sa i kont sa dan la vi ! Bavo kant mèm lékip le Port !

Justin