Mézami kan l’otan épi zétazini la déside rapatriye zot solda, mwin lé sirésèrtin la plipar d’moune in pé o kouran sak téi spass dann l’Afghanistan dopi in bonpé d’tan la panss san tardé bande taliban téi sava ropran lo pouvoir.

Dabor lo pouvoir instalé dann Kaboul-kapitale lo péi – téi tienbo arienk pars bande solda l’Otan épi bande solda amérikin téi tienbo ali an plass. Dézyèm zafèr bande taliban téi kontinyé amène la guèr avek souvan défoi lo konkour la popilassyon lokal épi la konplissité lo Pakistan, in péi alyanssé avèk bande zamérikin, mé an doublé zé avèk bande taliban konm baze aryère lo mouvman taliban.

Téi parl galman la korupssyon dann kaboul. Dokoi fé tonb lo pouvoir konm in shato d’karte i tonb… I paré an pliss l’Otan avèk l’amérik la aplike in stratézi dégajman la fé konm in lapèl d’èr pou bande taliban é zot guérilla dann lo péi. Ni pé ankor azoute in n’afèr sé ké bande répiblikkin, bnade démokrate, épi lopignon piblik amérikin té an majorité pou dégaz lo péi é pou ramenn bande solda amérikin zot kaze.

Dèrnyé lépizode lété partikilyèrman ridikil é sa téi oi bien dann lékran la télé : an-o néna lo prézidan l’amérik ki di la shute lo gouvèrnman afghan lé pa iminan, é an dsou i anonss lo prézidan gouvèrnman afghan la fine sov dann in péi déor épi déklare bande taliban la ranporte la viktoire.

Bravo l’amérik, bravo l’Otan zot i sorte ranporte in gran viktoir. Sirman ké La Chine avèk la Russie téi atande pa manzé kui téi sar tonb viteman konmsa dann zot boush.