M’a rakonte azot in n’afère téi ésspass kan mwin la sorte lo kour primère pou alé dann kour sogondère, kan mwin la kite mon vilaz Boi d’nèf pou alé lissé lokonte de lisle. Sète ané-la té i ariv amwin tazantan artourn koze avèk mon bande kamarade lo kour primère é an partikilyé koze avèk Zozèf in lansiklopédi la kitir popilère.

Zordi mi di sa mé dann tan kan li téi ralkonte amwin bande dovine-dovinaye, mwin téi trouv pa sa intéréssan, mwin téi panss mèm téi falé ète in pé taré pou rakonte dé shoze konmsa. Or zordi mi panss si l’avé in taré rante noute dë lété mwin é pa li : Mwin lété dsi la route pou pran in zour lassansère sosyal la départmantalizassion par an-o é li téi prépare ali pou rèss dsi lo bande marsh d’an ba léskalyé sosyal. .

Mé li téi prépare ali pou rèss, san vouloir, dann kan bande défandèr la kiltir rényonèz é son l’idantité.Li téi ariv la natirèlman, sosyalman, mèm politikman si ni di la politik sé la vi dan la sité.Si La Rényon lé zordi konmsa avèk la kiltir ké ni koné, lidantité ké ni koné , la lang ké ni koné sé pliss par bande zaktèr konmsa –konm mon kamarade zozèf épi in bonpé d’ote ankor..

Zot i koné dsi l’internet néna a boir é a manzé, néna mèm a dégueulé, é tazantan mi antande bande kozman de moune admiré é rokonu , pti bourjoi aliéné in maks apré s’plainde dann zot zénèss zot té maléré, zot téi viv dann in milyé yab lé o, pov an kiltir é zot téi soufère konm pa possib an atandan d’rouv léspri dann la kiltire rokoni, établi, onoré …pou mwin robotizé artifissyalizé apovri pou vréman . Mi souète lo pèp va anvoye azot dingué.

Na pwin pti pèp ! Na pwin pti kiltir ! Bravo la kiltir rényonèze popilère !

Justin