Kan Olivier Bancoult la parl lo pétisyon li té i sar anvoy la Mézon blansh, moin la trouv té in bon l’idé. Pou kosa ? Pa pars moin té i kroi Obama té i sava rann bann Shagosien zot tèr. Si moin té i kroi sa, moin n’arté kroi Pèr-Noèl. Mi pans galman bann Shagosien lé pa non pli si tèt vid ké sa. Zot i lite dépi si tèlman lontan ké zot lé péyé pou konèt lé shoz lé pa si fasil pou bann pèp abandoné. Té in bon n’afèr, pars i fo touzour profite l’okazyon, é sa té in l’okazyon. Dézyèm z’afèr, kan moin la vi koman té difisil sign lo pétisyon, moin la di dan mon kèr : « Ala ankor in mové kou bann z’Amérikin ! Zot i done aou soi-dizan lo droi pou protèsté, mé zot tik-tak lé tèlman konpliké ké ou i vien pa bou ».

Anfin, koman-koman bann komité la rézistans épi la solidarité la mèt an marsh. Bancoult la vni La Rényon, li la koz dann télé, li la koz dann radio, li la vni l’asanblé zénéral Comité solidarité Chagos Rényon, é li la ésplik pou kosa té i falé sign pétisyon. Li la bien di, si vinn-sink mil pèrsone i sign, Prézidan Obama va ésplik pou kosa son péi nana in gran baz dann Diégo Garcia, é pou kosa bann Shagosien lé défandi d’sézour shé zot. Sirtou, aprésa, pèrsone i gingn ar pa di si nana in posibilité fé avans zot koz, bann Shagosien i tiliz pa.

In moi pou fé sign lo pétisyon par vinn-sink mil pèrsone, in konba pèrdi avann komansé. Poitan, Rényoné, Morisien, d’ot nasyon ankor la done la min bann Shagosien pou ariv o-bi ; la mèm dépas lo bi, vi k’vint-ui-mil é kèk pèrsone la signé. Bravo zot tout, bravo nout tout, pou la solidarité, rant frèr, rant kouzin, rantre nou.

 Justin